نیشنل ویمنز ٹی 20 ٹورنامنٹ: ایمن فاطمہ کی سنچری، انوینسیبلز اور کنکررز کی فتح سے مہم کا آغاز

فیصل آباد: 10 اکتوبر (ڈیجیٹل اطلاع): فیصل آباد میں شروع ہونے والے نیشنل ویمنز ٹی 20 ٹورنامنٹ کے افتتاحی روز انوینسیبلز اور کنکررز نے شاندار کارکردگی کا مظاہرہ کرتے ہوئے اپنے اپنے میچز جیت لیے ہیں۔ یاد رہے کہ ٹورنامنٹ کے تمام میچز فیصل آباد میں کھیلے جا رہے ہیں۔

دن کے پہلے میچ میں انوینسیبلز نے چیلنجرز کو 72 رنز کے بھاری مارجن سے شکست دے دی۔ انوینسیبلز کے 175 رنز کے بڑے ہدف کے جواب میں چیلنجرز کی پوری ٹیم 103 رنز پر آؤٹ ہو گئی۔ انوینسیبلز کی فتح کی نمایاں بات ایمن فاطمہ کی جارحانہ سنچری تھی، جنہوں نے صرف 49 گیندوں پر 12 چوکوں اور 6 چھکوں کی مدد سے سو رنز کی اننگز کھیلی۔ بیٹنگ میں سدرہ امین 48 رنز بنا کر ناٹ آؤٹ رہیں، جبکہ بالنگ میں عروب شاہ نے 3 وکٹیں حاصل کر کے اپنی ٹیم کی فتح کو یقینی بنایا۔

دوسرے میچ میں کنکررز نے سخت مقابلے کے بعد اسٹارز کو 16 رنز سے شکست دے دی۔ کنکررز کے دیے گئے 121 رنز کے تعاقب میں اسٹارز کی ٹیم 104 رنز پر ڈھیر ہو گئی۔ کنکررز کی جانب سے گل رخ 42 رنز بنا کر نمایاں بیٹر رہیں، جبکہ بالنگ میں حمنہ بلال اور نیہا شرمین نے شاندار بالنگ کا مظاہرہ کرتے ہوئے دو، دو وکٹیں حاصل کیں