‘مرزا پور’ کا دھماکہ خیز ٹریلر جاری، بڑے پردے پر ایک بار پھر طاقت اور انتقام کی جنگ

ممبئی (12 اگست 2026): مقبول او ٹی ٹی سیریز ’مرزا پور‘ کے مداحوں کا انتظار ختم ہوگیا، فلم ’مرزا پور دی مووی‘ کا انتہائی متوقع ٹریلر جاری کردیا گیا ہے، جس نے ریلیز سے قبل ہی سوشل میڈیا پر دھوم مچا دی ہے۔

ممبئی میں منعقدہ ایک تقریب کے دوران فلم کا ٹریلر پیش کیا گیا، جس میں ’مرزا پور‘ کی معروف دنیا، طاقت کی کشمکش، انتقام، تشدد اور ڈرامائی لمحات کی جھلک دکھائی گئی ہے۔

فلم میں علی فضل، پنکج ترپاٹھی، دویندو اور دیگر معروف اداکار اپنے مقبول کرداروں میں دوبارہ نظر آئیں گے۔ گرمیت سنگھ کی ہدایت کاری میں بننے والی فلم کی کاسٹ میں جتیندر کمار، روی کشن اور رسیکا دوگل بھی شامل ہیں۔

ٹریلر نے سوشل میڈیا پر مچائی دھوم

ٹریلر جاری ہوتے ہی سوشل میڈیا صارفین نے اس پر بھرپور ردعمل کا اظہار کیا۔ کئی مداحوں نے فلم کے انداز، شدت اور ’مرزا پور‘ فرنچائز کے مخصوص رنگ کو سراہا۔

ایک صارف نے ٹریلر کو ’’بڑے پردے پر تباہی‘‘ قرار دیتے ہوئے کہا کہ اس میں ’مرزا پور‘ سے جڑی شدت اور جنون کو برقرار رکھا گیا ہے۔

ایک اور صارف نے ٹریلر کی تعریف کرتے ہوئے ممکنہ سینسر کٹوتیوں پر تشویش کا اظہار کیا۔

طاقت، انتقام اور ڈرامے سے بھرپور فلم

ٹریلر میں طاقتور کرداروں کے درمیان کشمکش، انتقام اور سنسنی خیز واقعات کی جھلکیاں دکھائی گئی ہیں۔ مداحوں کا کہنا ہے کہ فلم میں وہی بے باک اور شدید انداز برقرار رکھا گیا ہے جس نے ’مرزا پور‘ سیریز کو مقبول بنایا۔

’مرزا پور دی مووی‘ 4 ستمبر 2026 کو سینما گھروں میں ریلیز ہوگی۔