فیصل آباد: 6اکتوبر(ڈیجیٹل اطلاع) منگل کے روز اقبال اسٹیڈیم فیصل آباد میں کھیلے گئے روایتی ویمنز انڈر 19 ٹی ٹوئنٹی ٹرائی نیشن سیریز کے چوتھے میچ میں بنگلہ دیش انڈر 19 ویمن نے پاکستان کو 13 رنز سے ہرا دیا۔ ٹورنامنٹ میں پاکستانی ٹیم کی یہ دوسری شکست ہے۔
پہلے بیٹنگ کرتے ہوئے بنگلہ دیش نے مقررہ 20 اوورز میں 5 وکٹوں کے نقصان پر 139 رنز بنائے، جس کے جواب میں پاکستانی ٹیم 7 وکٹوں پر 126 رنز ہی بنا سکی۔
بنگلہ دیشی اننگز کا آغاز انتہائی خراب رہا اور دوسرے ہی اوور میں 4 کے مجموعی اسکور پر 2 وکٹیں گر گئیں، تاہم نیشتا اختر نشی (20) اور اوچینا جنت (17) نے ٹیم کو سنبھالا دیا۔ بعد ازاں سعدیہ اسلام کے 24 رنز کے بعد مہمان ٹیم 88 کے اسکور پر 5 وکٹیں گنوا بیٹھی تھی۔ تاہم، سعدیہ اختر (ناقابلِ شکست 33) اور فرجانہ اسمیم (ناقابلِ شکست 28) نے چھٹی وکٹ کے لیے ناقابلِ شکست 51 رنز کی شاندار شراکت قائم کر کے اسکور 139 تک پہنچایا۔ پاکستان کی جانب سے روزینہ اکرم اور مہام نزاکت نے دو دو وکٹیں حاصل کیں۔
ہدف کے تعاقب میں پاکستان نے اچھا آغاز کیا اور اوپنرز کومل خان (36) اور روایل فرحان (32) نے 69 رنز کی شراکت قائم کی، تاہم 10ویں اوور میں دونوں کے آؤٹ ہونے کے بعد اننگز لڑکھڑا گئی۔ زوفیشاں ایاز نے 30 گیندوں پر 32 رنز کی ناٹ آؤٹ اننگز کھیل کر ٹیم کو میچ میں رکھنے کی کوشش کی مگر باقاعدہ وقفے سے گرنے والی وکٹوں نے فتح کی راہ روک دی۔ بنگلہ دیش کی جانب سے فرجانہ نے 25 رنز کے عوض 3 وکٹیں حاصل کیں۔
پوائنٹس ٹیبل پر سر فہرست بنگلہ دیشی ٹیم جمعرات 8 اکتوبر کو ٹورنامنٹ کے پانچویں میچ میں سری لنکا کے مدِمقابل ہوگی۔
تازہ ترین پوسٹس
