فیصل آباد 2 اکتوبر ڈیجیٹل اطلاع: پنجاب حکومت نے سروسز اینڈ جنرل ایڈمنسٹریشن ڈیپارٹمنٹ کی جانب سے جاری کردہ نوٹیفیکیشن کے مطابق صوبے میں ایک بڑے انتظامی ردو بدل کا اعلان کرتے ہوئے کئی اہم اضلاع اور محکموں میں سینئر صوبائی مینجمنٹ اور پاکستان ایڈمنسٹریٹو سروس کے افسران کے تقرر و تبادلے کر دیے ہیں۔ ایس اینڈ جی اے ڈی میں ان ہانسنگ ڈیلیوری اینڈ گورنمنٹ ایفیشنسی ونگ کے سیکرٹری کے طور پر فرائض انجام دینے والے سید محمد مسعود نعمان کو وزیراعلیٰ پنجاب کا سیکرٹری (عمل درآمد) مقرر کر دیا گیا ہے۔
نئے تقرر و تبادلوں کے تحت، عبدالرزاق کو ڈپٹی کمشنر حافظ آباد کے عہدے سے تبدیل کرکے اسپیشل سیکرٹری وزیراعلیٰ آفس تعینات کیا گیا ہے، جبکہ حسین بہادر علی شاہ نے حافظ آباد کے نئے ڈپٹی کمشنر کے طور پر چارج سنبھال لیا ہے۔ محمد عثمان خالد کو ڈپٹی کمشنر ڈیرہ غازی خان سے تبدیل کرکے ایڈیشنل سیکرٹری محکمہ آبپاشی پنجاب لگا دیا گیا ہے اور انہیں ڈیرہ غازی خان ڈویلپمنٹ اتھارٹی کے ڈائریکٹر جنرل کے اضافی چارج سے بھی فارغ کر دیا گیا ہے۔ بلال سلیم کو ڈپٹی کمشنر کوٹ ادو سے تبدیل کرکے ڈیرہ غازی خان کا ڈپٹی کمشنر تعینات کیا گیا ہے، اور انہیں ڈی جی کے ڈیولپمنٹ اتھارٹی کا اضافی چارج بھی سونپ دیا گیا ہے۔
اس کے علاوہ، محمد جواد حیدر شاہ کو ڈپٹی کمشنر کوٹ ادو اور محمد جمیل کو ایڈیشنل ڈپٹی کمشنر (ریونیو) بھکر تعینات کیا گیا ہے۔ دریں اثنا، رائے ذوالفقار علی کو مزید احکامات کے لیے ایس اینڈ جی اے ڈی رپورٹ کرنے کی ہدایت کر دی گئی ہے۔
تازہ ترین پوسٹس
