فیصل آباد — بورڈ آف انٹرمیڈیٹ اینڈ سیکنڈری ایجوکیشن فیصل آباد کے تحت انٹرمیڈیٹ پارٹ اول سالانہ امتحان 2026ء میں 109,244 طلباء و طالبات نے شرکت کی، جن میں سے 77,708 کامیاب ہوئے، جبکہ کامیابی کی شرح 71.13 فیصد رہی۔ نتائج کا اعلان بدھ کو تعلیمی بورڈ فیصل آباد کے آڈیٹوریم میں منعقدہ تقریب کے دوران کیا گیا۔ چیئرمین بورڈ پروفیسر ڈاکٹر رانا بنیامین نے نتائج آن لائن جاری کیے، جس کے بعد انہیں بورڈ کی ویب سائٹ پر بھی اپ لوڈ کر دیا گیا۔ چیئرمین بورڈ نے تقریب سے خطاب کرتے ہوئے کہا کہ امتحانی نظام میں شفافیت، میرٹ اور معیار کو یقینی بنانے کے لیے جدید ٹیکنالوجی سے استفادہ کیا جا رہا ہے۔
انہوں نے کہا کہ نوجوانوں کو جدید، تکنیکی اور معیاری تعلیم کے مواقع فراہم کرنا وقت کی ضرورت ہے، جبکہ امتحانی نظام کو مزید مؤثر اور شفاف بنانا اور طلباء و طالبات کو بہتر سہولیات فراہم کرنا بورڈ کی ترجیحات میں شامل ہے۔ پروفیسر ڈاکٹر رانا بنیامین کے مطابق بورڈ نے حالیہ عرصے میں طلباء و طالبات کو سرٹیفکیٹس ان کے تعلیمی اداروں یا درج شدہ گھریلو پتوں پر ارسال کرنے کا عمل شروع کیا ہے۔ انہوں نے کہا کہ 2024ء اور 2025ء کے میٹرک اور انٹرمیڈیٹ کے سالانہ اور ضمنی امتحانات کے سرٹیفکیٹس ارسال کیے جا چکے ہیں، جبکہ 2026ء کے سرٹیفکیٹس بھی اگلے امتحان سے قبل ارسال کرنے کا ہدف ہے۔
انہوں نے بتایا کہ بورڈ نے نادرا کے ساتھ مفاہمتی یادداشت پر دستخط کیے ہیں، جس کے تحت رجسٹریشن کے وقت طلباء و طالبات کے نام، ولدیت اور تاریخ پیدائش کے کوائف کی تصدیق نادرا کے ریکارڈ سے کی جائے گی۔ چیئرمین بورڈ کے مطابق بورڈ نے یو بی ایل کے ساتھ بھی مفاہمتی یادداشت پر دستخط کیے ہیں، جس کے تحت سپروائزری سٹاف سمیت متعلقہ عملے کے معاوضے چیک کے بجائے براہِ راست ان کے بینک اکاؤنٹس میں منتقل کیے جائیں گے۔ کنٹرولر امتحانات پروفیسر رانا عتیق الرحمن نے بتایا کہ انٹرمیڈیٹ پارٹ اول سالانہ امتحان 20 مئی 2026ء کو شروع ہوا اور پریکٹیکلز سمیت 31 اگست کو مکمل ہوا۔ انہوں نے کہا کہ امتحانات کے انعقاد سے نتائج کی تیاری تک تمام مراحل مقررہ قواعد و ضوابط کے مطابق مکمل کیے گئے۔ ان کے مطابق سپروائزری سٹاف اور ریذیڈنٹ انسپکٹرز کی تربیت بھی کی گئی تاکہ امتحانی عمل کے معیار کو بہتر بنایا جا سکے۔
سیکرٹری بورڈ پروفیسر ڈاکٹر سلیم تقی شاہ نے پوزیشن ہولڈرز، ان کے والدین اور اساتذہ کو مبارکباد دیتے ہوئے کہا کہ طلباء کی کامیابی میں والدین اور اساتذہ کا کردار اہم ہے۔ انہوں نے کہا کہ بورڈ تعلیمی نظام میں بہتری اور طلباء کو سہولیات کی فراہمی کے لیے اقدامات جاری رکھے گا۔ تقریب میں پوزیشن ہولڈرز طلباء و طالبات میں انعامات تقسیم کیے گئے۔ تقریب کا آغاز تلاوتِ قرآن پاک سے ہوا، جبکہ معروف نعت خواں احسان اویسی نے نعت پیش کی۔ تقریب کے اختتام پر پوزیشن ہولڈرز کے ساتھ چیئرمین بورڈ کا گروپ فوٹو بھی لیا گیا۔
تازہ ترین پوسٹس
