کمشنر فیصل آباد ڈویژن و صدر بورڈ آف گورنرز ڈاکٹر عمران حامد شیخ کی صدارت میں پرنسپلز کانفرنس

فیصل آباد: 13 اکتوبر 2026 (ڈیجیٹل اطلاع): کمشنر فیصل آباد ڈویژن و صدر بورڈ آف گورنرز (بی او جی) ڈی پی ایس اینڈ سی، ڈی ایم سی اور صندل کالج، ڈاکٹر عمران حامد شیخ (پی اے ایس، ٹی آئی) کی صدارت میں ڈویژنل پبلک اسکول اینڈ کالج (ڈی پی ایس اینڈ سی) فیصل آباد میں ایک اعلیٰ سطحی پرنسپلز کانفرنس کا انعقاد کیا گیا۔ اجلاس میں کمشنر کی زیرِ سرپرستی قائم تمام تعلیمی اداروں کی جاری تعلیمی پیش رفت اور انتظامی کارکردگی کا تفصیلی جائزہ لیا گیا۔

کانفرنس کے دوران کمشنر فیصل آباد نے تعلیمی اداروں کو جدید خطوط پر استوار کرنے کے لیے ایک سٹریٹجک ویژن پیش کیا اور ادارہ جاتی مؤثریت، تعلیمی معیار میں بہتری اور انتظامی امور کو مضبوط بنانے کے لیے اہم ہدایات جاری کیں۔ اس موقع پر محترم ڈائریکٹر اسکول سیل، جناب آصف اقبال چوہان نے اداروں کی مجموعی کارکردگی اور اہم عملی امور پر تفصیلی بریفنگ پیش کی۔

اجلاس میں ڈی پی ایس اینڈ سی مین کیمپس، ڈی ایم سی، ڈی پی ایس پریمیئر کیمپس، صندل کالج اور ڈی پی ایس اینڈ سی تاندلیانوالہ کے پرنسپلز نے شرکت کی اور اپنے اپنے اداروں کے ترقیاتی منصوبے اور مستقبل کی حکمتِ عملی پیش کی۔ پرنسپل ڈی پی ایس اینڈ سی عالیہ ایوب چٹھہ نے بورڈ کے نتائج، پوزیشنوں، تعلیمی ترقیاتی منصوبے اور اسکول کی مستقبل کی حکمتِ عملی پر مفصل رپورٹ پیش کی، جسے صدرِ مجلس نے بیحد سراہا اور منظور کیا۔

صدر بورڈ آف گورنرز ڈاکٹر عمران حامد شیخ نے تمام پرنسپلز کی کاوشوں کو سراہتے ہوئے ہدایت کی کہ وہ طلبہ کے تدریسی نتائج، اساتذہ کی جدید تربیتی طریقہ کار، اور طلبہ کی کردار سازی و ہمہ جہت شخصیت نگاری پر مبنی جامع و نتیجہ خیز منصوبے تشکیل دیں۔ انہوں نے اعادہ کیا کہ وہ ان اداروں کو تعلیمی فضیلت، جدت اور اعلیٰ تربیتی مراکز میں ڈھالنے کے لیے ہر ممکن راہنمائی اور مکمل سرپرستی فراہم کرتے رہیں گے۔