ورلڈ کپ سے قبل مراکش کو بڑا دھچکا، دو اہم کھلاڑی انجری کے باعث اسکواڈ سے باہر

رباط: فیفا ورلڈ کپ کے آغاز سے قبل مراکش کی قومی فٹبال ٹیم کو بڑا نقصان اٹھانا پڑا ہے، جہاں ٹیم کے دو اہم کھلاڑی نائف اگرد اور عبدالصمد الزلزولی (ابدی عزالزولی) انجری کے باعث ٹورنامنٹ سے باہر ہو گئے ہیں۔

مراکش فٹبال فیڈریشن اور فیفا نے تصدیق کی ہے کہ دونوں کھلاڑیوں کی جگہ سعودی عرب میں کھیلنے والے دفاعی کھلاڑی مروان سعدانے اور اسٹرائیکر امین صبائی کو اسکواڈ میں شامل کر لیا گیا ہے۔

30 سالہ نائف اگرد مارچ کے آغاز سے ہی گروئن انجری کے باعث میدان سے باہر تھے۔ ان کی انجری اتنی سنگین تھی کہ انہیں سرجری کروانا پڑی، جبکہ بعد ازاں اپریل میں معائنے کے دوران ان کی شرم گاہ کی ہڈی (پبک بون) میں فریکچر بھی سامنے آیا، جس سے ان کی واپسی مزید تاخیر کا شکار ہو گئی۔

مراکش کے ہیڈ کوچ محمد وہابی کو امید تھی کہ اگرد ورلڈ کپ سے قبل مکمل فٹنس حاصل کر لیں گے، تاہم جمعرات کو حتمی فیصلہ کیا گیا کہ وہ رواں ماہ کینیڈا، میکسیکو اور امریکہ میں ہونے والے ورلڈ کپ کے لیے دستیاب نہیں ہوں گے۔

دوسری جانب 24 سالہ ونگر عبدالصمد الزلزولی کو گزشتہ ہفتے ناروے کے خلاف کھیلے گئے دوستانہ میچ کے دوران عجیب حادثاتی انجری کا سامنا کرنا پڑا۔

نیوجرسی کے شہر ہیریسن میں ہونے والے میچ میں مراکش ایک کارنر کک کا دفاع کر رہا تھا کہ ان کے ساتھی کھلاڑی شادی ریاض غیر متوازن انداز میں گرتے ہوئے الزلزولی کے دائیں گھٹنے پر آ گرے۔ الزلزولی نے کھیل جاری رکھنے کی کوشش کی، لیکن شدید تکلیف کے باعث چند ہی لمحوں بعد میدان چھوڑنے پر مجبور ہو گئے۔

دونوں کھلاڑی مراکش کی اس تاریخی ٹیم کا حصہ تھے جس نے قطر میں ہونے والے گزشتہ ورلڈ کپ میں سیمی فائنل تک رسائی حاصل کر کے افریقی فٹبال کی تاریخ رقم کی تھی۔ اس کے علاوہ دونوں رواں سال جنوری میں مراکش میں منعقدہ افریقن کپ آف نیشنز کے فائنل تک پہنچنے والی ٹیم میں بھی شامل تھے۔

ورلڈ کپ مہم کو دھچکا

اہم کھلاڑیوں کی غیر موجودگی مراکش کی ورلڈ کپ مہم کے لیے ایک بڑا دھچکا تصور کی جا رہی ہے، کیونکہ دونوں کھلاڑی ٹیم کے دفاع اور حملے میں کلیدی کردار ادا کرتے رہے ہیں۔ اب شائقین کی نظریں نئے شامل ہونے والے کھلاڑیوں پر ہوں گی کہ آیا وہ اس خلا کو پُر کرنے میں کامیاب ہو پاتے ہیں یا نہیں۔