شکیب الحسن نے وطن واپسی کی خواہش ظاہر کر دی، حکومت سے سکیورٹی کی ضمانت مانگ لی

نئی دہلی، 7 اگست (رائٹرز): بنگلہ دیش کے مایہ ناز آل راؤنڈر اور سابق کپتان شکیب الحسن نے کہا ہے کہ وہ دو سالہ جلاوطنی ختم کرکے وطن واپس آنے، اپنے خلاف قتل سمیت دیگر مقدمات کا سامنا کرنے اور اپنے کیریئر کی الوداعی بین الاقوامی سیریز کھیلنے کے لیے تیار ہیں، بشرطیکہ حکومت ان کی سکیورٹی کی ضمانت دے۔

39 سالہ شکیب الحسن، جو سابق وزیراعظم شیخ حسینہ کی جماعت عوامی لیگ کے رکن پارلیمنٹ بھی رہ چکے ہیں، اگست 2024 میں طلبہ کی قیادت میں ہونے والی تحریک کے نتیجے میں حکومت کے خاتمے کے بعد سے امریکا میں مقیم ہیں۔

شکیب نے رائٹرز کو سری لنکا سے ٹیلی فون پر بتایا کہ وہ اب بھی بنگلہ دیش کی نمائندگی کرتے ہوئے اپنے ملک میں الوداعی سیریز کھیلنے اور 2027 کے ایک روزہ ورلڈ کپ میں شرکت کی امید رکھتے ہیں۔

انہوں نے کہا، "اگر حکومت مجھے یہ یقین دہانی کرائے کہ میری سکیورٹی یقینی بنائی جائے گی تو میں خوشی سے وطن واپس آؤں گا، عدالت میں مقدمات کا سامنا کروں گا اور جو بھی قانونی تقاضے ہوں گے، انہیں پورا کروں گا۔"

شکیب الحسن کی ممکنہ واپسی کو سابق وزیراعظم شیخ حسینہ کی حکومت کے خاتمے کے بعد پیدا ہونے والی سیاسی صورتحال کا ایک اہم امتحان قرار دیا جا رہا ہے۔ حسینہ کے متعدد قریبی ساتھیوں کی طرح شکیب بھی مختلف مقدمات کا سامنا کر رہے ہیں اور تاحال وطن واپس نہیں آئے۔

ان کی واپسی سے یہ بھی واضح ہو سکتا ہے کہ وزیراعظم طارق رحمان کی حکومت سابق حکمران جماعت عوامی لیگ سے وابستہ شخصیات کے ساتھ کس نوعیت کا رویہ اختیار کرتی ہے۔ دوسری جانب شیخ حسینہ بھی، جنہیں بنگلہ دیش میں سزائے موت سنائی جا چکی ہے، دسمبر میں وطن واپس آنے کے اپنے ارادے کا اعلان کر چکی ہیں۔