فیصل آباد، 25 اگست 2026: کمشنر فیصل آباد ڈاکٹر عمران حامد شیخ نے کمشنر آفس کے پروگرامر محمد جاوید باجوہ کو سرکاری فرائض لگن اور مہارت سے انجام دینے پر سراہتے ہوئے ان کے اعزاز میں تقریب کا انعقاد کیا۔

تقریب میں کمشنر آفس کے ایڈیشنل کمشنرز، اسسٹنٹ کمشنرز اور دیگر افسران نے شرکت کی۔

ڈاکٹر عمران حامد شیخ نے کہا کہ پروگرامر جاوید باجوہ نے کمشنر کے پیش کردہ مختلف آئیڈیاز کو بہترین انداز میں تیار کیا، جنہیں وزیراعلیٰ پنجاب مریم نواز شریف اور چیف سیکرٹری پنجاب زاہد اختر زمان کے سامنے پیش کیا گیا۔

انہوں نے بتایا کہ وزیراعلیٰ اور چیف سیکرٹری نے ان آئیڈیاز کو سراہا اور صوبے کے دیگر کمشنرز کو بھی اسی طرز پر اقدامات پر عملدرآمد کی ہدایت کی۔

کمشنر نے جاوید باجوہ کی پیشہ ورانہ صلاحیتوں اور محنت کو سراہتے ہوئے کہا کہ سرکاری اداروں میں جدید ٹیکنالوجی اور تخلیقی آئیڈیاز کے مؤثر استعمال سے عوامی خدمات کو مزید بہتر بنایا جا سکتا ہے۔

اس موقع پر پروگرامر محمد جاوید باجوہ نے حوصلہ افزائی پر کمشنر فیصل آباد کا شکریہ ادا کیا اور آئندہ بھی اسی جذبے اور لگن کے ساتھ سرکاری فرائض انجام دینے کے عزم کا اظہار کیا۔