شہر میں ڈرینج اور سیوریج نظام کی بہتری کے لیے 11 ارب 10 کروڑ روپے کے منصوبے منظور

فیصل آباد، 18 اگست 2026ء: ڈویژنل ڈویلپمنٹ ورکنگ پارٹی (DDWP) نے فیصل آباد شہر میں نکاسی آب اور سیوریج کے نظام کو بہتر بنانے کے لیے مجموعی طور پر 11 ارب 10 کروڑ روپے کی لاگت کے تین اہم منصوبوں کی منظوری دے دی۔

ڈویژنل ڈویلپمنٹ ورکنگ پارٹی کا اجلاس کمشنر فیصل آباد ڈاکٹر عمران حامد شیخ کی زیر صدارت ڈی سی آفس میں منعقد ہوا۔ اجلاس میں ڈپٹی کمشنر محمد نعمان صدیق، ڈائریکٹر ڈویلپمنٹ آصف چوہان، ایم ڈی واسا ثاقب رضا اور ہائی ویز کے افسران نے شرکت کی۔

اجلاس میں فیصل آباد شہر کے ڈرینج سسٹم کی اپ گریڈیشن کے لیے 3 ارب 80 کروڑ روپے کی منظوری دی گئی۔

اسی طرح شاداب کالونی، محمد پورہ، بدر کالونی، دارالحسان ٹاؤن، تلیاں والا، جھنگ روڈ اور نڑوالا روڈ سمیت دیگر آبادیوں میں سیوریج سسٹم کی بحالی کے لیے 3 ارب 30 کروڑ روپے مختص کیے گئے۔

اجلاس میں رسالہ والا روڈ سے ڈجکوٹ سیپج ڈرین تک سلج کیریئر کی تعمیر و مرمت کے لیے بھی 4 ارب روپے کی منظوری دی گئی۔

تینوں منصوبے بالترتیب 31 مارچ 2027ء، 31 دسمبر 2026ء اور 30 جون 2027ء تک مکمل کیے جائیں گے۔

کمشنر فیصل آباد ڈاکٹر عمران حامد شیخ نے متعلقہ افسران کو ہدایت کی کہ تمام منصوبے مقررہ مدت کے اندر مکمل کیے جائیں تاکہ شہریوں کو سیوریج اور نکاسی آب کے دیرینہ مسائل سے نجات دلائی جا سکے۔

انہوں نے کہا کہ عوامی فلاح کے منصوبوں میں تاخیر برداشت نہیں کی جائے گی اور شہریوں کو بہتر نکاسی آب کی سہولیات کی فراہمی انتظامیہ کی اولین ترجیحات میں شامل ہے۔