شہریوں کے ساتھ خوش اخلاقی سے پیش آئیں اور پینڈنگ درخواستیں جلد نمٹائیں: سی پی او تنویر حسین کی فرنٹ ڈیسک آپریٹرز سے میٹنگ

فیصل آباد: 7 اکتوبر (ڈیجیٹل اطلاع) سی پی او فیصل آباد تنویر حسین نے پولیس کمیونٹی انگیجمنٹ سنٹر میں ضلع بھر کے تمام تھانوں کے فرنٹ ڈیسک آپریٹرز کا ایک اہم اجلاس طلب کیا۔ اس میٹنگ کا مقصد تھانوں کی سطح پر پبلک ڈیلنگ، سائلین کی دادرسی اور ریکارڈ کی بروقت تکمیل کا جائزہ لینا تھا۔

اجلاس کے دوران سی پی او فیصل آباد نے فرنٹ ڈیسک آپریٹرز کو ہدایت کی کہ وہ تھانوں میں آنے والے سائلین کے ساتھ انتہائی خوش اخلاقی اور خلوص سے پیش آئیں تاکہ عوام کا پولیس پر اعتماد مزید مضبوط ہو۔ انہوں نے واضح کیا کہ تھانوں میں موجود تمام پینڈنگ درخواستوں اور ریفرنسز کو فوری طور پر نمٹایا جائے، تمام مقدمات کے ریکارڈ کی بروقت تکمیل کو یقینی بنایا جائے، اور شہریوں کو کرایہ داری کے اندراج سمیت دیگر تمام قانونی سہولیات بلا تاخیر فراہم کی جائیں۔

تنویر حسین نے زور دیا کہ تمام ملازمین اپنے فرائض کی انجام دہی کے دوران شہریوں کے ساتھ مکمل تعاون کریں، کیونکہ شہریوں کو انصاف کی فراہمی اور ان کے مسائل کا حل اولین ترجیح ہے۔ انہوں نے خبردار کیا کہ ڈیوٹی میں کسی بھی قسم کی غفلت یا لاپرواہی ہرگز برداشت نہیں کی جائے گی۔