تاندلیانوالہ میں گھریلو تلخی اور چھری کا حملہ: شوہر نے بچانے والی محلے دار خاتون سمیت بیوی کو زخمی کر دیا، ملزم گرفتار

فیصل آباد: 10 اکتوبر (ڈیجیٹل اطلاع): تاندلیانوالہ کے علاقے تھانہ ماموں کانجن کی حدود میں واقع طارق کالونی میں دل دہلا دینے والا واقعہ پیش آیا ہے، جہاں ایک مشتعل شوہر نے چھری کے وار کر کے اپنی بیوی اور ایک محلے دار خاتون کو شدید زخمی کر دیا۔ فیصل آباد پولیس نے بروقت کارروائی کرتے ہوئے ملزم کو گرفتار کر لیا ہے۔

موصولہ اطلاعات کے مطابق طارق کالونی کی رہائشی محلے دار خاتون رفیعہ پروین زوجہ ارشاد احمد گھر کے باہر موجود تھیں کہ ملزم عبدالجبار ولد عبدالحق نے اچانک ان پر چھری سے پے در پے وار کر دیے، جس سے وہ شدید زخمی ہو گئیں۔ اس دوران ملزم کی بیوی فاطمہ بی بی نے آگے بڑھ کر محلے دار خاتون کو بچانے کی کوشش کی، تاہم طیش میں آکر ملزم نے اپنی بیوی پر بھی چھری سے حملہ کر دیا جس کے نتیجے میں ان کے بازو پر گہرے زخم آئے۔

واقعے کی اطلاع ملتے ہی پولیس موقع پر پہنچ گئی اور فوری کارروائی کرتے ہوئے مبینہ ملزم عبدالجبار کو گرفتار کر کے آلہ قتل قبضے میں لے لیا۔ زخمی ہونے والی خاتون رفیعہ پروین کو تشویشناک حالت میں طبی امداد کے لیے تحصیل ہیڈ کوارٹراسپتال تاندلیانوالہ منتقل کر دیا گیا ہے، جبکہ فاطمہ بی بی کو بھی ابتدائی طبی امداد فراہم کی گئی ہے۔ پولیس نے ملزم کے خلاف مقدمہ درج کر کے مزید قانونی کارروائی کا آغاز کر دیا ہے۔