فیصل آباد، 12 اگست (نمائندہ خصوصی): فیصل آباد میں تنظیم اللسان کے زیرِ اہتمام خصوصی بچوں کے لیے جشنِ آزادی کی ایک پروقار تقریب منعقد کی گئی، جس میں خصوصی بچوں نے قومی پرچم تھام کر پاکستان سے اپنی والہانہ محبت کا اظہار کیا اور قومی جوش و جذبے کے ساتھ تقریبات میں حصہ لیا۔
تقریب کے دوران پرچم کشائی کی گئی، جشنِ آزادی کا کیک کاٹا گیا جبکہ خصوصی بچوں کی جانب سے تیار کردہ پینٹنگز کی ایک خصوصی نمائش بھی سجائی گئی۔ نمائش میں متاثرہ سماعت طلبہ کی بنائی گئی خوبصورت اور بامعنی تصاویر پیش کی گئیں، جنہوں نے حاضرین کی بھرپور توجہ حاصل کی۔
تقریب کی مہمانِ خصوصی ڈائریکٹر سوشل ویلفیئر فیصل آباد ڈویژن خالدہ رفیق تھیں۔ اس موقع پر صدر تنظیم اللسان ڈاکٹر افتخار احمد، سینئر نائب صدر چوہدری سرفراز احمد، جنرل سیکرٹری سبحان علی، پرنسپل کلثوم افتخار، سینئر وائس پرنسپل شائستہ ارشاد، وائس پرنسپل صبا سعود، فیکلٹی ممبران، خصوصی بچوں اور ان کے والدین کی بڑی تعداد بھی موجود تھی۔
تقریب سے خطاب کرتے ہوئے خالدہ رفیق نے کہا کہ خصوصی افراد معاشرے کا اہم حصہ ہیں اور انہیں قومی تقریبات اور خوشیوں میں برابر کا شریک بنانا ہم سب کی مشترکہ ذمہ داری ہے۔ انہوں نے کہا کہ خصوصی بچوں میں بے پناہ صلاحیتیں، تخلیقی سوچ اور وطن سے محبت کا جذبہ موجود ہے، جسے مناسب مواقع اور حوصلہ افزائی کے ذریعے مزید نکھارا جا سکتا ہے۔
انہوں نے تنظیم اللسان کی خدمات کو سراہتے ہوئے کہا کہ ادارہ خصوصی بچوں کی تعلیم، تربیت اور صلاحیتوں کے فروغ کے لیے قابلِ قدر کردار ادا کر رہا ہے۔ ان کے مطابق بچوں کی تیار کردہ پینٹنگز ان کی تخلیقی صلاحیتوں اور حب الوطنی کا خوبصورت مظہر ہیں۔
خالدہ رفیق نے کہا کہ جشنِ آزادی جیسے قومی مواقع خصوصی بچوں کو اپنی صلاحیتوں کے اظہار اور معاشرے میں مثبت کردار ادا کرنے کا بہترین پلیٹ فارم فراہم کرتے ہیں۔
اس موقع پر صدر تنظیم اللسان ڈاکٹر افتخار احمد نے مہمانِ خصوصی اور شرکاء کا شکریہ ادا کرتے ہوئے کہا کہ قومی تہواروں اور اہم دنوں کی تقریبات میں خصوصی بچوں کی بھرپور شرکت کو ادارے کی روایت بنایا گیا ہے۔
انہوں نے کہا کہ خصوصی بچوں کو قومی تقریبات میں شامل کرنے کا مقصد ان میں حب الوطنی، قومی یکجہتی اور معاشرتی وابستگی کے جذبات کو فروغ دینا ہے۔ انہوں نے اس عزم کا اظہار کیا کہ تنظیم اللسان خصوصی بچوں کی فلاح و بہبود، تعلیم اور کردار سازی کے لیے اپنی سرگرمیاں جاری رکھے گی اور انہیں قومی و سماجی سرگرمیوں میں مزید مواقع فراہم کیے جائیں گے۔
تقریب کے اختتام پر پاکستان کی سلامتی، ترقی، خوشحالی اور استحکام کے لیے خصوصی دعا بھی کی گئی۔
Latest Posts
