اسلام آباد، 25 اگست 2026: اسٹیٹ بینک آف پاکستان نے 10 روپے کا بینک نوٹ ختم کرنے کی سفارش کردی ہے، جبکہ حکومت نئے ڈیزائن اور جدید سکیورٹی خصوصیات سے مزین کرنسی نوٹ متعارف کرانے کی تیاری کر رہی ہے۔

اسٹیٹ بینک کے ڈپٹی گورنر نے سینیٹ کی قائمہ کمیٹی برائے خزانہ و محصولات کے اجلاس میں بتایا کہ نئے کرنسی نوٹوں کے ڈیزائن کی منظوری دی جاچکی ہے اور مرکزی بینک ان کے اجرا کے لیے مزید اقدامات کر رہا ہے۔

انہوں نے کہا کہ وفاقی کابینہ کی منظوری کے بعد بھی نئے نوٹوں کے اجرا میں تقریباً ایک سال لگ سکتا ہے۔ نئے نوٹوں کی مالیت اور ڈینومینیشنز کے بارے میں حتمی فیصلہ وفاقی کابینہ کرے گی۔

ڈپٹی گورنر کے مطابق اسٹیٹ بینک نے موجودہ 10 روپے کے نوٹ کو مرحلہ وار ختم کرنے کی سفارش کی ہے۔

اے ٹی ایم سے جعلی نوٹ نکلنے پر تشویش

سینیٹ کمیٹی کے اجلاس میں اے ٹی ایم مشینوں سے مبینہ طور پر 5 ہزار اور ایک ہزار روپے کے جعلی نوٹ جاری ہونے کی رپورٹس پر بھی تشویش کا اظہار کیا گیا۔

کمیٹی کے چیئرمین سینیٹر سلیم مانڈوی والا نے اسٹیٹ بینک سے جعلی کرنسی کی روک تھام اور بینکاری نظام کے ذریعے اس کی گردش کو روکنے کے لیے کیے گئے اقدامات کی تفصیلات طلب کیں۔

حکام نے بتایا کہ نئے کرنسی نوٹوں کے اجرا کے ساتھ ملک کے کرنسی پروڈکشن سسٹم کو بھی جدید بنایا جائے گا تاکہ جعلی نوٹوں کی تیاری اور گردش کے امکانات کو کم کیا جاسکے۔

5 ہزار روپے کے نوٹ کی تیاری پر 14 روپے لاگت

سینیٹر عبدالقادر کے سوال پر اسٹیٹ بینک کے ڈپٹی گورنر نے بتایا کہ 5 ہزار روپے کے ایک نوٹ کی تیاری پر تقریباً 14 روپے لاگت آتی ہے۔

سینیٹر سلیم مانڈوی والا نے نئے نوٹوں کے ڈیزائن کے لیے کنسلٹنٹ کی خدمات حاصل کرنے کے عمل پر بھی سوال اٹھایا اور متعلقہ ٹینڈر کی تفصیلات کمیٹی کو فراہم کرنے کا مطالبہ کیا۔

انہوں نے کہا کہ کمیٹی کو کسی بین الاقوامی بینک نوٹ پرنٹنگ کمپنی سے کرنسی کی تیاری کے عمل پر بریفنگ بھی دی جانی چاہیے۔

نئے نوٹوں پر دو سال سے کام جاری

سینیٹر شہزیب درانی نے کہا کہ اسٹیٹ بینک نئے کرنسی نوٹوں پر تقریباً دو سال سے کام کر رہا ہے لیکن یہ عمل اب تک مکمل نہیں ہوا۔

حکام کے مطابق نئے بینک نوٹوں کے ڈیزائن میں جدید سکیورٹی خصوصیات شامل کی جائیں گی۔ ابتدائی ڈیزائن دستی طور پر تیار کرنے کے بعد انہیں مشینی عمل کے ذریعے حتمی پرنٹنگ کے لیے تیار کیا جائے گا۔

کمیٹی نے نئے کرنسی نوٹوں کے ٹینڈرنگ عمل اور جعلی کرنسی کو بینکاری نظام میں داخل ہونے سے روکنے کے لیے مجوزہ اقدامات کی مزید تفصیلات بھی طلب کرلی ہیں۔