نیشنل ویمنز ٹی 20 ٹورنامنٹ کا باقاعدہ آغاز: ایمن فاطمہ کی شاندار سنچری، انوینسیبلز اور کنکررز کی اپنے اپنے میچز میں کامیابیاں

فیصل آباد: 10 اکتوبر (ڈیجیٹل اطلاع): نیشنل ویمنز ٹی 20 ٹورنامنٹ کے پہلے روز کے مقابلوں میں انوینسیبلز نے ایمن فاطمہ کی شاندار سنچری کی بدولت چیلنجرز کو 72 رنز سے شکست دے دی، جبکہ دوسرے میچ میں کنکررز نے اسٹارز کے خلاف 16 رنز سے فتح حاصل کر لی۔

بحران والا گراؤنڈ میں کھیلے گئے میچ میں رائٹ ہینڈ بیٹر ایمن فاطمہ نے 49 گیندوں پر 12 چوکوں اور 6 چھکوں کی مدد سے دلکش 100 رنز بنائے، جبکہ سدرہ امین 48 رنز بنا کر ناٹ آؤٹ رہیں۔ انوینسیبلز نے مقررہ 20 اوورز میں 4 وکٹوں کے نقصان پر 175 رنز کا بڑا ہدف قائم کیا۔ چیلنجرز کی جانب سے ام ہانی اور رابیہ رانی نے دو دو وکٹیں حاصل کیں۔ جواب میں چیلنجرز کی پوری ٹیم 17 اوورز میں 103 رنز پر ڈھیر ہو گئی، جس میں عائشہ ظفر 27 رنز بنا کر نمایاں رہیں۔ سیدہ عروب شاہ نے 24 رنز کے عوض 3 وکٹیں حاصل کر کے اپنی ٹیم کو شاندار کامیابی دلائی۔ ایمن فاطمہ کو پلیئر آف دی میچ قرار دیا گیا۔

دوسری جانب جواد کلب گراؤنڈ میں کھیلے گئے میچ میں کنکررز نے مقررہ 20 اوورز میں 9 وکٹوں کے نقصان پر 120 رنز بنائے۔ گل رخ نے 42 رنز کی نمایاں اننگز کھیلی، جبکہ اسٹارز کی جانب سے ثمینہ آفتاب نے صرف 4 رنز دے کر 2 وکٹیں حاصل کیں اور مومنہ ریاست و ڈیانا بیگ نے بھی دو دو وکٹیں حاصل کیں۔ 121 رنز کے ہدف کے تعاقب میں اسٹارز کی ٹیم 19.3 اوورز میں 104 رنز پر آؤٹ ہو گئی۔ مناہل 35 رنز کے ساتھ نمایاں رہیں۔ کنکررز کی حمنہ بلال اور نیہا شرمین نے دو دو وکٹیں حاصل کیں۔ شاندار اننگز پر گل رخ کو پلیئر آف دی میچ کا ایوارڈ دیا گیا۔