اسلام آباد، 15 اگست — نیشنل ڈیٹابیس اینڈ رجسٹریشن اتھارٹی (نادرا) نے 14 اگست سے کیو آر کوڈ پر مبنی چِپ فری قومی شناختی کارڈز کا مرحلہ وار اجرا شروع کردیا ہے۔

نادرا کے مطابق پاکستان میں تیار کیے گئے نئے شناختی کارڈ میں روایتی چِپ کے بجائے کیو آر کوڈ استعمال کیا گیا ہے۔

ادارے کے مطابق جنوری 2027 سے کیو آر کوڈ پر مبنی نئے کارڈ کا اجرا نائیکوپ (NICOP) اور جووینائل کارڈ سمیت قومی شناختی دستاویزات کی تمام اقسام کے لیے کیا جائے گا، جبکہ بعد کے مرحلے میں پاکستان اوریجن کارڈ (POC) کو بھی نئے چِپ فری نظام میں منتقل کردیا جائے گا۔

پرانے شناختی کارڈ بدستور کارآمد رہیں گے

نادرا نے واضح کیا ہے کہ نئے چِپ فری شناختی کارڈ کے اجرا سے پہلے سے جاری شناختی کارڈ منسوخ نہیں ہوں گے۔

اتھارٹی کے مطابق موجودہ شناختی کارڈ اپنی مقررہ تاریخِ میعاد تک مکمل طور پر کارآمد رہیں گے، اور شہریوں کو صرف نئے نظام کے اجرا کی وجہ سے فوری طور پر اپنا موجودہ کارڈ تبدیل کرنے کی ضرورت نہیں ہوگی۔