3 کروڑ روپے تاوان کے لیے مبینہ طور پر اغوا ہونے والا شخص پولیس کی جانب سے خرلیانوالہ کے علاقے سے بازیاب کرائے جانے کے بعد متعدد مقدمات میں مطلوب نکلا۔
پولیس کے مطابق عمیر نامی شخص کے مبینہ اغوا اور 3 کروڑ روپے تاوان طلب کیے جانے کی اطلاع اس کی اہلیہ کی جانب سے دی گئی تھی، جس کے بعد پولیس نے کارروائی کرتے ہوئے اسے خرلیانوالہ کے علاقے سے بازیاب کر لیا۔
تاہم بازیابی کے بعد پولیس کی تحقیقات میں انکشاف ہوا کہ عمیر کے خلاف دھوکہ دہی اور امانت میں خیانت کے 10 سے زائد مقدمات درج ہیں اور وہ پولیس کو مطلوب تھا۔
تھانہ مدینہ ٹاؤن کے ایس ایچ او کے مطابق عمیر ایک مقدمے میں تھانے کو مطلوب تھا، جس کے بعد اسے متعلقہ پولیس کے حوالے کر دیا گیا ہے۔
پولیس کا کہنا ہے کہ مبینہ اغوا، تاوان کی اطلاع اور عمیر کے خلاف درج مقدمات سمیت تمام قانونی پہلوؤں پر کارروائی جاری ہے۔
یوں 3 کروڑ روپے تاوان کے لیے مبینہ اغوا کا معاملہ اس وقت نیا رخ اختیار کر گیا جب پولیس کی جانب سے بازیاب کرائے جانے کے بعد مبینہ مغوی خود متعدد مقدمات میں مطلوب شخص نکلا۔
Latest Posts
