ڈائریکٹر لائیوسٹاک کا چنیوٹ کا دورہ، ویٹرنری سہولیات اور سیلابی تیاریوں کا جائزہ

فیصل آباد، 10 اگست: ڈائریکٹر لائیوسٹاک ڈاکٹر حیدر علی خان نے ضلع چنیوٹ کا تفصیلی دورہ کیا، جہاں انہوں نے جاری ترقیاتی منصوبوں، ویٹرنری انفراسٹرکچر، جدید طبی و تشخیصی سہولیات اور ممکنہ سیلابی صورتحال سے نمٹنے کے لیے محکمہ لائیوسٹاک کی تیاریوں کا جائزہ لیا۔

ایڈیشنل ڈائریکٹر لائیوسٹاک چنیوٹ ڈاکٹر عطا سبحانی بھی ان کے ہمراہ تھے۔

ڈاکٹر حیدر علی خان نے ایڈیشنل ڈائریکٹر لائیوسٹاک آفس، سول ویٹرنری ہسپتال، ڈپٹی ڈائریکٹر لائیوسٹاک آفس اور ڈسٹرکٹ ڈائگناسٹک لیبارٹری چنیوٹ کا معائنہ کیا۔ اس دوران جاری تعمیر و مرمت کے کام، ویٹرنری طبی سہولیات، ویکسین اسٹور، سہولت مرکز، میڈیسن اسٹور اور دیگر دستیاب سہولیات کا جائزہ لیا گیا۔

ڈسٹرکٹ ڈائگناسٹک لیبارٹری چنیوٹ کی زیر تعمیر عمارت کے معائنے کے دوران ڈائریکٹر لائیوسٹاک نے تعمیراتی کام کی پیش رفت اور معیار کا جائزہ لیا۔ انہوں نے متعلقہ افسران کو ہدایت کی کہ منصوبے کو مقررہ مدت میں مکمل کیا جائے اور تعمیراتی معیار، پائیداری اور تمام ضروری تکنیکی تقاضوں کو یقینی بنایا جائے۔

انہوں نے سول ویٹرنری ہسپتال چنیوٹ میں نئے تعمیر شدہ جدید آپریشن تھیٹر کا بھی معائنہ کیا۔ ڈاکٹر حیدر علی خان نے کہا کہ جدید آپریشن تھیٹر کی سہولت ویٹرنری سروسز کو بہتر اور جدید تقاضوں سے ہم آہنگ بنانے کی جانب اہم پیش رفت ہے۔

انہوں نے افسران کو ہدایت کی کہ دستیاب وسائل کو مویشی پال حضرات کی بہتر خدمت کے لیے مؤثر انداز میں استعمال کیا جائے۔

دورے کے دوران ممکنہ سیلابی صورتحال سے نمٹنے کے لیے محکمہ لائیوسٹاک کی تیاریوں کا بھی جائزہ لیا گیا۔ متعلقہ افسران کو ہدایت کی گئی کہ ضروری ادویات، ویکسین، عملے اور دیگر وسائل کی دستیابی یقینی بنائی جائے تاکہ کسی بھی ہنگامی صورتحال میں مویشی پال حضرات کو بروقت ویٹرنری سہولیات فراہم کی جا سکیں۔

ڈائریکٹر لائیوسٹاک نے ہدایت کی کہ تمام جاری ترقیاتی منصوبے مقررہ مدت، مطلوبہ معیار، پائیداری اور عملی ضروریات کے مطابق مکمل کیے جائیں تاکہ مویشی پال حضرات کو جدید، معیاری اور مؤثر ویٹرنری طبی و تشخیصی سہولیات کی فراہمی یقینی بنائی جا سکے۔