فیصل آباد کے سرکاری اسکولوں نے میٹرک امتحانات میں 3 پوزیشنز حاصل کرلیں

فیصل آباد، 10 اگست: آل گورنمنٹ ایمپلائیز گرینڈ الائنس (AGEGA) پنجاب کے چیئرمین حافظ غلام محی الدین اور تنظیم اساتذہ پاکستان ضلع فیصل آباد کے صدر حافظ عبدالناصر نے چیف ایگزیکٹو آفیسر ڈسٹرکٹ ایجوکیشن اتھارٹی راؤ عبدالکریم سے ملاقات کی۔

ملاقات کے دوران وفد نے فیصل آباد بورڈ کے میٹرک امتحانات میں سرکاری اسکولوں کی شاندار کارکردگی اور تین پوزیشنز حاصل کرنے پر چیف ایگزیکٹو آفیسر کو مبارکباد دی۔

وفد نے سینکڑوں اساتذہ کی بروقت ترقیوں پر بھی راؤ عبدالکریم کی کاوشوں کو سراہا۔ اس کے علاوہ طلباء کی کردار سازی کے لیے جاری اقدامات کی تعریف کرتے ہوئے تربیتِ طلباء کے پروگرام کو تسلسل کے ساتھ جاری رکھنے پر زور دیا۔

سی ای او ایجوکیشن نے بتایا کہ طلباء میں انفارمیشن ٹیکنالوجی کی تعلیم اور عملی مہارتوں کے فروغ کے لیے "Learn to Earn" پروگرام شروع کیا گیا ہے، جس کے پہلے مرحلے میں 200 طلبہ کو مفت آئی ٹی کورس کرایا گیا ہے۔

انہوں نے کہا کہ پروگرام مکمل کرنے کے بعد طلباء اپنے خاندانوں کی کفالت کے لیے مناسب آمدن حاصل کرنے کے قابل ہوں گے۔ پائلٹ پروگرام کی کامیابی کے بعد ہر تحصیل میں لڑکوں اور لڑکیوں کے لیے الگ الگ تربیتی مراکز قائم کیے جائیں گے۔

وفد نے طلباء کی فلاح و بہبود اور تعلیمی ترقی کے لیے شروع کیے گئے تمام پروگراموں میں ہر ممکن تعاون کی یقین دہانی کرائی۔