فیصل آباد میں تجاوزات کے خلاف بلاامتیاز آپریشن جاری رکھنے کا حکم
فیصل آباد، 10 اگست: کمشنر فیصل آباد و ایڈمنسٹریٹر میونسپل کارپوریشن ڈاکٹر عمران حامد شیخ نے شہر بھر میں تجاوزات کے خلاف آپریشن پوری قانونی قوت کے ساتھ بلاامتیاز جاری رکھنے کی ہدایت کی ہے۔
میونسپل کارپوریشن کے افسران کے اجلاس کی صدارت کرتے ہوئے کمشنر نے کہا کہ تجاوز شدہ پختہ اور عارضی تعمیرات کو مسمار کیا جائے اور آپریشن کی روزانہ کی بنیاد پر پیش رفت رپورٹ شیئر کی جائے۔
انہوں نے تجاوزات مافیا کے خلاف جاری گرینڈ آپریشن میں میونسپل آفیسر ریگولیشن کی کارکردگی کو سراہتے ہوئے ہدایت کی کہ کارروائی میں کسی قسم کی نرمی نہیں ہونی چاہیے۔
ڈاکٹر عمران حامد شیخ نے کہا کہ سڑکوں اور گلیوں میں تجاوزات ٹریفک کی بلاتعطل روانی میں رکاوٹ بنتی ہیں، اس لیے ان کا خاتمہ ضروری ہے تاکہ قانون کی بالادستی کے ساتھ شہریوں کو صاف ستھرا ماحول اور آمدورفت میں آسانی فراہم کی جا سکے۔
کمشنر نے میونسپل افسران کی روزانہ کارکردگی کا جائزہ لینے کا بھی فیصلہ کیا اور کہا کہ شہریوں کو ہر شعبے میں ریلیف فراہم کرنا انتظامیہ کی اولین ترجیح ہے۔
انہوں نے کہا کہ ایسے مؤثر اقدامات کیے جائیں جن سے شہریوں کی شکایات کا بروقت ازالہ ہو اور میونسپل کارپوریشن کو شکایت فری ادارہ بنایا جا سکے۔
ڈاکٹر عمران حامد شیخ نے کہا کہ میونسپل کارپوریشن کی سروسز کا معیار عوامی توقعات سے بڑھانے تک انتظامیہ اپنی کوششیں جاری رکھے گی۔
Latest Posts
