ڈاکٹر عظمیٰ کی عمران خان سے ملاقات اور محمد مرسی کا حوالہ: مصر کے سابق صدر کی موت کیسے ہوئی؟

اسلام آباد: ڈاکٹر عظمیٰ نیازی نے اپنے بھائی اور سابق وزیراعظم عمران خان سے پمز ہسپتال میں ملاقات کے بعد دعویٰ کیا ہے کہ عمران خان نے دورانِ گفتگو متعدد بار مصر کے سابق صدر محمد مرسی کا حوالہ دیا اور اپنی صحت اور قید کے حالات سے متعلق تشویش کا اظہار کیا۔

عظمیٰ نیازی نے جمعہ کی صبح اسلام آباد میں پریس کانفرنس کرتے ہوئے کہا کہ عمران خان نے انہیں بتایا کہ انہیں قیدِ تنہائی میں رکھا جا رہا ہے اور ان کی جانب سے علاج کی درخواست کے باوجود مناسب طبی سہولیات فراہم نہیں کی جا رہیں۔

پاکستان تحریک انصاف کا مؤقف ہے کہ عمران خان کو اڈیالہ جیل میں قیدِ تنہائی کا سامنا ہے اور انہیں مناسب طبی سہولیات نہیں مل رہیں۔ دوسری جانب حکومت کا کہنا ہے کہ سابق وزیراعظم کو ضرورت کے مطابق تمام طبی سہولیات فراہم کی جا رہی ہیں۔

وفاقی وزیر اطلاعات عطا تارڑ نے بھی جمعہ کو کہا کہ عمران خان کو پہلے بھی طبی سہولیات فراہم کی جاتی رہی ہیں اور ضرورت پڑنے پر آئندہ بھی فراہم کی جائیں گی۔

ڈاکٹر عظمیٰ کی پریس کانفرنس کے بعد سوشل میڈیا پر محمد مرسی کی موت کے حالات بھی زیرِ بحث آئے۔

محمد مرسی کی موت کیسے ہوئی؟

مصر کے سابق صدر محمد مرسی 17 جون 2019 کو قاہرہ میں ایک عدالت میں مقدمے کی سماعت کے دوران بے ہوش ہو کر گر پڑے اور بعد ازاں انتقال کر گئے۔ مصری حکام کے مطابق ان کی موت دل کا دورہ پڑنے کے باعث ہوئی۔

مرسی کو عدالت میں ایک ساؤنڈ پروف پنجرے میں رکھا گیا تھا، جہاں انہوں نے تقریباً پانچ منٹ تک عدالت سے خطاب کیا۔ اس کے بعد وہ بے ہوش ہو گئے۔ اس وقت ان کے خلاف فلسطینی تنظیم حماس کے ساتھ مبینہ رابطوں سے متعلق جاسوسی کے مقدمے کی سماعت جاری تھی۔

انسانی حقوق کی تنظیموں اور مرسی کے خاندان نے اس وقت الزام عائد کیا تھا کہ انہیں دورانِ حراست مناسب طبی سہولیات فراہم نہیں کی گئیں اور طویل عرصے تک قیدِ تنہائی میں رکھا گیا۔

ایمنسٹی انٹرنیشنل کے مطابق مرسی کو قید کے دوران اپنے خاندان سے ملاقات کے محدود مواقع ملے جبکہ ان کی طبی اور قانونی رسائی کے حوالے سے بھی خدشات ظاہر کیے گئے تھے۔ ہیومن رائٹس واچ نے بھی ان کی حراست کے حالات پر شدید تحفظات کا اظہار کیا تھا۔

محمد مرسی کون تھے؟

محمد مرسی 1951 میں مصر کے صوبہ شرقیہ میں پیدا ہوئے۔ انہوں نے قاہرہ یونیورسٹی سے انجینئرنگ کی تعلیم حاصل کی اور بعد میں امریکہ سے پی ایچ ڈی کی۔

وہ 2012 میں مصر کے پہلے جمہوری طور پر منتخب صدر بنے، تاہم ان کی حکومت صرف ایک سال تک قائم رہی۔

3 جولائی 2013 کو بڑے پیمانے پر احتجاج کے بعد مصری فوج نے ان کی حکومت ختم کر دی اور انہیں گرفتار کر لیا۔ اس کے بعد ان کے خلاف مختلف مقدمات قائم کیے گئے۔

مرسی اور اخوان المسلمین کے دیگر رہنماؤں پر مظاہرین کو حراست میں لینے، تشدد، غیر ملکی عناصر کے ساتھ رابطوں، سرکاری معلومات افشا کرنے اور دیگر الزامات کے تحت مقدمات چلائے گئے۔

مرسی نے اپنے خلاف مقدمات اور ان کی حکومت کے خاتمے کو فوجی بغاوت قرار دیتے ہوئے عدالت کے اختیار کو تسلیم کرنے سے بھی انکار کیا تھا۔

17 جون 2019 کو عدالت میں ان کی اچانک موت کے بعد ان کی حراست، طبی سہولیات اور قیدِ تنہائی کے حالات پر عالمی سطح پر سوالات اٹھائے گئے۔