بابر اعظم کی بڑی واپسی، آئی سی سی ٹیسٹ رینکنگ میں ٹاپ 10 میں شامل

ویسٹ انڈیز کے خلاف شاندار کارکردگی کے بعد پاکستانی کپتان کی پانچ درجے ترقی

پاکستانی کرکٹ ٹیم کے کپتان بابر اعظم نے آئی سی سی ٹیسٹ رینکنگ میں شاندار واپسی کرتے ہوئے ٹاپ 10 میں جگہ بنا لی ہے۔

آئی سی سی کی جانب سے جاری کردہ تازہ ٹیسٹ رینکنگ کے مطابق بابر اعظم پانچ درجے ترقی کے بعد 15ویں سے 10ویں نمبر پر پہنچ گئے ہیں۔

بابر اعظم نے ویسٹ انڈیز کے خلاف دو ٹیسٹ میچز کی سیریز میں مجموعی طور پر 193 رنز بنائے اور شاندار کارکردگی پر مین آف دی سیریز کا اعزاز حاصل کیا۔

بابر اعظم ستمبر 2024 میں ٹیسٹ کی ٹاپ 10 رینکنگ سے باہر ہوگئے تھے۔ اس سے قبل دسمبر 2022 میں انگلینڈ کے خلاف ہوم سیریز کے دوران وہ ٹیسٹ رینکنگ میں اپنے کیریئر کی بہترین دوسری پوزیشن حاصل کرچکے ہیں۔

عبداللہ شفیق کی بھی بڑی چھلانگ

پاکستان کے اوپننگ بیٹر عبداللہ شفیق نے بھی رینکنگ میں نمایاں بہتری حاصل کی ہے۔ وہ 25 درجے ترقی کرکے 32ویں نمبر پر پہنچ گئے ہیں۔

عبداللہ شفیق نے ویسٹ انڈیز کے خلاف میچ میں 160 اور 24 رنز کی ناقابل شکست اننگز کھیل کر پلیئر آف دی میچ کا اعزاز حاصل کیا تھا۔

ساجد خان اور شاہین آفریدی کی پوزیشن

بولرز کی رینکنگ میں ویسٹ انڈیز کے شمر جوزف 19ویں نمبر پر پہنچ گئے ہیں، جبکہ پاکستان کے اسپنر ساجد خان 30ویں اور شاہین شاہ آفریدی 29ویں نمبر پر موجود ہیں۔

بیٹرز کی عالمی رینکنگ میں آسٹریلیا کے ٹریوس ہیڈ پہلے اور انگلینڈ کے ہیری بروک دوسرے نمبر پر ہیں۔

بولرز کی فہرست میں بھارت کے جسپریت بمراہ بدستور پہلے نمبر پر ہیں، جبکہ نیوزی لینڈ کے میٹ ہینری دوسرے نمبر پر موجود ہیں۔